Við á Íslandi finnum mismikið fyrir villtri náttúru umhverfis okkur, sumir búa í sveit og aðrir í þéttbýli. En hvar sem við búum erum við öll hluti af náttúrunni og hún er alls staðar í kringum okkur. Í þéttbýli finnum við síður fyrir hinni villtu náttúru, en tökum frekar eftir manngerðu umhverfi eins og malbiki og byggingum. Á göngustígnum, leikvellinum eða skólalóðinni finnst samt alls konar náttúra sem er hluti af umhverfi alls konar lífvera. Blóm, gras og mosi spretta upp á milli gangstéttarhella eða upp úr steypu og malbiki. Fuglar syngja í trjám og utan á byggingum og smádýr flögra og skríða um. 

Hvað finnst í þínu nánasta umhverfi?